Ҳафтаи аврупоии иммунизатсия дар Ҷумҳурии Тоҷикистон

Душанбе, 19 апрел. (АМИТ «Ховар», Ибодат Давлатова).- Аз 22-юм то 27-уми апрели соли ҷорӣ бо ташаббуси Ташкилоти умумиҷаҳонии тандурустӣ даври ҳаштуми Ҳафтаи аврупоии иммунизатсия гузаронида мешавад.   Чуноне ки ба мухбири АМИТ «Ховар» аз Вазорати тандурустии Ҷумҳурии Тоҷикистон иттилоъ доданд, ҳафтаи аврупоии иммунизатсия — ин ташаббусест, ки ба баланд бардоштани дониши аҳолӣ оид ба бемориҳои сироятии ба воситаи иммунизатсия идорашаванда ва фоидабахшии иммунизатсия равона шудааст.Мақсади чорабинӣ баланд намудани сатҳи фарогирии иммунизатсия ба воситаи баланд бардоштани дониши аҳолӣ оид ба зарурият ва ҳуқуқи ҳар як кўдак нисбат ба муҳофизати ў аз бемориҳои сироятӣ мебошад. Диққати махсус ба гуруҳҳои алоҳидаи аҳолӣ дода мешавад. Бояд гуфт, ки Ҳафтаи аврупоии иммунизатсия куллан барои баланд бардоштани донишу малакаҳои аҳолӣ оид ба фоидабахшӣ ва моҳияти иммунизатсия бахшида шуда, диққати махсус ба аҳолии маҳаллаҳои дурдасту душворрас равона мешавад.