Ҷаласаи Шӯрои вазирони корҳои хориҷии ИДМ

Душанбе, 6 апрел. (АМИТ «Ховар»).- 5 апрели соли 2013 муовини аввали вазири корҳои хориҷии Ҷумҳурии Тоҷикистон Маҳмудҷон Собиров дар ҷаласаи навбатии Шӯрои вазирони корҳои хориҷии Иттиҳоди Давлатҳои Мустақил дар шаҳри Тошкант иштирок намуд. Дар ҷаласа роҳбарони ҳайатҳо оид ба доираи васеи ҳамкориҳо дар соҳаи сиёсати байналмилалӣ мубодилаи афкор намуданд. Иштирокчиёни ҷаласа як силсила ҳуҷҷатҳоро, ки ба таҳкими ҳамкориҳои байнидавлатӣ дар соҳаҳои гуманитарӣ, таъмини амният ва дигар самтҳо равона шудаанд, мавриди муҳокима қарор доданд. Аз ҷумла, ҳуҷҷатҳо доир ба ҳамкорӣ ҷиҳати созмон додани фазои ягонаи таълимии ИДМ, оид ба эътирофи тарафайни ҳуҷҷатҳои маълумоти олӣ ва олии касбӣ, оид ба эълон намудани соли 2014 — Соли сайёҳӣ дар Иттиҳоди Давлатҳои Мустақил ва нақшаи чорабиниҳо барои солҳои 2013-2015 ҷиҳати татбиқи «Стратегияи рушди тарбияи ҷисмонӣ ва варзиши давлатҳои аъзои Иттиҳоди Давлатҳои Мустақил то соли 2020» тасдиқ шуданд. Инчунин Шӯрои вазирони корҳои хориҷии аъзои давлатҳои ИДМ Консепсияи ҳамкории давлатҳои аъзои Иттиҳоди Давлатҳои Мустақилро дар соҳаи мубориза бар зидди ҷиноятҳое, ки бо истифода аз технологияҳои иттилоотӣ содир шудаанд, Созишнома оид ба тартиби ташкил ва истифодаи гурӯҳҳои муштараки мутахассисони мақомоти сарҳадӣ барои вокуниши фаврӣ алайҳи таҳдид ба амнияти марзӣ дар сарҳади берунаи давлатҳои аъзои Иттиҳоди Давлатҳои Мустақил тасдиқ намуда, барои баррасӣ ба Шӯрои сарони давлатҳои ИДМ пешниҳод кард.