Баргузории ҷаласаи ёздаҳуми Шӯрои машваратии назди Президенти ҶТ

Душанбе, 30 апрел. (АМИТ «Ховар», Дилшодаи Хайруллоҳ).- Имрӯз таҳти раёсати Сарвазири мамлакат Оқил Оқилов ҷаласаи ёздаҳуми Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ баргузор гардид.Дар ҷаласа нахуст аъзои нави Шӯро аз ҷониби шарикони рушд –Роҳбари намояндагиҳои Иттиҳоди Аврупо ва Корпоратсияи байналмилалии молиявӣ дар Ҷумҳурии Тоҷикистон Эдуард Ауер ва Кристофер Миллер муррифӣ гардида, гузориши Котиби масъули Шӯро, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Давлаталӣ Саидов оид ба натиҷаҳои мониторинги қарорҳои Шӯрои машваратӣ шунида шуд.Оқил Оқилов изҳор дошт, ки Ҳукумати мамлакат дар партави сиёсати пешгирифтаи Президенти Ҷумҳурии Тоҷикистон пайваста талош бар он дорад, ки фазои сармоягузорӣ мутобиқ ба меъёрҳои байналмилалӣ гардида, бо ин васила дар беҳтар намудани сатҳи некӯаҳволии мардум ва таъмини рушди босуботи иқтисодию иҷтимои мамлакат нақши арзанда гузошта шавад.Дар ҷаласа ҳамзамон доир ба беҳтар намудани фазои сармоягузорӣ дар ВМКБ ахбори раиси вилоят Қодири Қосим ва оид ба масъалаҳои дигари рӯзнома ахбори аъзои Шӯрои машваратӣ аз ҷониби бахши хусусии ватанӣ ва аз ҷониби шарикони рушд шунида шуд. Дар анҷоми ҷаласа Сарвазири мамлакат Оқил Оқилов ба сохторҳои масъули давлатӣ оид ба беҳтар гардонидани шароити соҳибкорию сармоягузорӣ дар мамлакат дастуру супоришҳои мушаххас дода, таъкид кард, ки ба баррасии ҷаласаи ояндаи Шӯрои машваратии назди Президенти Ҷумҳурии Тоҷикистон натиҷаҳои таҳлил вобаста ба беҳтар гардонидани фазои сармоягузорӣ дар бахши суғурта ва идомаи ислоҳот ва заминаи ислоҳоти низоми иҷозатномадиҳӣ пешниҳод карда шавад.