Баррасии қоидаҳои будубош дар Русия

Душанбе, 18 апрел. (АМИТ «Ховар», Ибодат Давлатова).-Яке аз самтҳои асосии фаъолияти Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия баланд бардоштани сатҳи маърифати ҳуқуқии муҳоҷирони меҳнатӣ -шаҳрвандони Ҷумҳурии Тоҷикистон мебошад. Бо ин мақсад дар манотиқи гуногуни Русия аз ҷониби кормандони намояндагӣ бо ҳамватанони мо, ки муваққатан дар субъектҳои хоҷагидори ин кишвар фаъолият доранд, пайваста вохӯриҳо баргузор менамоянд. Тавре ки ба мухбири АМИТ «Ховар» аз Хадамоти муҳоҷират хабар доданд, чунин як вохӯрӣ дар ҳамкорӣ бо роҳбарияти Ҷамъияти минтақавии Маркази фарҳангии тоҷикон «Дидор» дар шаҳри Екатеринбург гузаронида шуд. Ба толори Хонаи фарҳанги шаҳр барои иштирок дар ин вохӯрӣ бештар аз 350 нафар муҳоҷири меҳнатӣ, ки дар соҳаҳои гуногуни хоҷагии халқи вилояти Свердлов фаъолияти меҳнатӣ дорад, ҷамъ омаданд. Корманди намояндагӣ Шоҳназар Таваров ба ҳозирин оид ба қонуну қоидаҳои будубош ва тартиби фаъолияти меҳнатӣ маълумоти муфассал дод.Таъкид шуд, ки чанде қабл дар қонунҳои Федералии Русия дар самти муҳоҷирати меҳнатӣ тағйиру иловаҳо ба амал омаданд, ки донистани онҳо барои муҳоҷирони меҳнатӣ ҳатмӣ ва зарурист. Зикр гардид, агар шаҳрвандони хориҷӣ ва шахсони бешаҳрвандӣ, ки барояшон ворид шудан ба Федератсияи Русия манъ шудааст, дидаю дониста сарҳади ин кишварро убур намоянд, нисбат ба онҳо мувофиқи конунгузории ин давлат ҷарима дар ҳаҷми 300 000 рубли русӣ, ба меҳнати маҷбурӣ ҷалб намудан ба муҳлати на кам аз 4 сол ва ё аз озодӣ маҳрум кардан ба ҳамин муҳлат, барои шахсони ташкилкунанда маҳрум намудан аз озодӣ ба муҳлати 6 сол ҷазо муқаррар шудааст.