Донишҷӯён дастгирӣ меёбанд

Апрель 19, 2013 09:49

Душанбе, 19 апрел. (АМИТ «Ховар», Раъно Нусратуллоева).- Устоди факултаи иқтисодиёт ва идораи Донишгоҳи давлатии омӯзгории Тоҷикистон ба номи С.Айнӣ дар соҳаи маориф А.Насимов дар ҳамкорӣ бо ташкилоти «Вдохновение» ба донишҷӯписарон пойафзоли варзишӣ тақдим намуд. Мавсуф ҳангоми суҳбат ба мо иброз дошт, ки равобити дуҷонибаи ҳамкорӣ бо ин ташкилот солҳост, ки барқарор аст ва дар заминаи он ба толибилмон пайваста кӯмакҳои мухталиф расонида мешавад. Инак, ин навбат ба зиёда аз 300 донишҷӯписар, ки ба варзиш майлу рағбати беандоза доранд, пойафзоли махсуси варзишӣ ройгон дода шуд. Дар такя бар гуфтаи А.Насимов ҳамзамон ба донишҷӯёни ятиму камбизоат либосҳои гуногуни мардонаю занона туҳфа гардид. Дар радифи муҳассилин омӯзгорони эҳтиёҷманд низ аз ин кӯмакҳо баҳравар шуданд.Ёдовар мешавем, ки чанде қабл бо дастгирии ташкилоти «Вдохновение» ба 18 нафар донишҷӯи ятими донишгоҳ кӯмаки ғизоӣ дастрас шуд.

Апрель 19, 2013 09:49

Хабарҳои дигари ин бахш