Муҳокимаи масоили кӯмак ба муҳоҷирони меҳнатӣ

Душанбе, 30 апрел. (АМИТ «Ховар», Лутфия Эшонқулова). – 29 апрел дар шаҳри Маскав мулоқоти сардори шӯъбаи муҳоҷирати меҳнатии Намояндагии муҳоҷирати меҳнатии назди Ҳукумати ҶТ дар Федератсияи Русия М.Орифов, муовини директори Раёсати Созмони байналмилалии муҳоҷират дар шаҳри Маскав Павел Шалус ва роҳбари Барномаи минтақавии бахши муҳоҷирати меҳнатӣ дар Осиёи Марказӣ ва Русия Юлиана Павловская баргузор гардид.Тавре ки Намояндагии Хадамоти муҳоҷирати Ҷумҳурии Тоҷикистон дар Федератсияи Русия хабар медиҳад, дар ҷараёни мулоқот масоили расонидани кӯмаки иттилоотию машваратӣ ва ҳуқуқӣ ба муҳоҷирони меҳнатӣ мавриди муҳокима қарор гирифт.Бинобар тағйир ёфтани қонуни муҳоҷиратии Федератсияи Русия марбут ба муҳоҷирати меҳнатӣ, аҳд шуд, ки кори тавзеҳотӣ ба манзури расонидани кӯмаки ҳуқуқӣ ба гурӯҳҳои алоҳидаи муҳоҷирони меҳнатӣ танзим карда шавад.