Нуқтаи пайвастшавии марзи се кишвари ҳамҷавор муайян мегардад

Душанбе, 8 апрел.(АМИТ «Ховар», Марзия Саидова).- Дар ояндаи наздик Парлумони Тоҷикистон Созишномаи байни Ҷумҳурии Тоҷикистон, Ҷумҳурии Мардумии Чин ва Ҷумҳурии Исломии Афғонистон оид ба нуқтаи пайвастшавии сарҳадҳои давлатии се кишварро, ки имрӯз дар ҷаласаи Шӯрои Маҷлиси намояндагон баррасӣ гардид, тасдиқ менамояд. Созишномаи мазкур 5 июни соли 2012 дар Пекин ба имзо расида ва аз ҷониби Президенти ҷумҳурӣ барои тасдиқ ба Парлумони мамлакат пешниҳод гардид. Амирқул Азимов- раиси кумитаи палатаи поёнии Парлумони мамлакат оид ба тартиботи ҳуқуқӣ, мудофиа ва амният зимни тавзеҳи масъалаи мазкур дар ҷаласаи Шӯро гуфт, ки ҳадафи таҳия ва пешниҳоди ин санад дақиқ ва муайян намудани маҳали ҷойгиршавии нуқтаи пайвастшавии марзҳои се кишвар –Тоҷикистон, Чин ва Афғонистон аст. Созишнома аз се модда иборат буда, дар онҳо нуқтаву нишони пайвастшавии сарҳади давлатии се кишвари ҳамҷавор муайян гардидааст. Дар моддаи 2- и Созишнома зикр шудааст, ки тарафҳои аҳдкунанда ба он тавофуқ кардаанд, ки муайян намудани ҷои дақиқи нуқтаи пайвастшавии сарҳадҳои давлатӣ дар маҳал ва насби аломати сарҳадӣ дар ҳолати фароҳам шудани шароити мусоид барои ин кор амалӣ мешавад. Созишнома аз таърихи фиристодани огоҳиномаи охирини хаттӣ оид ба анҷоми расмиёти дохилидавлатии тарафҳои аҳдкунанда, ки барои эътибор пайдо кардани он зарур аст, мавриди амал қарор мегирад.