«Рӯзи дарҳои кушода барои намояндагони ВАО» дар Вазорати меҳнат

Душанбе, 27 апрел. (АМИТ «Ховар», Афшини Муқим).- 27-уми апрел Вазорати меҳнат ва ҳифзи иҷтимоии аҳолии мамлакат «Рӯзи дарҳои кушода барои намояндагони ВАО»-ро эълон намуд. Дар ин чорабини теъдоди зиёди намояндагони ВАО-и кишвар иштирок ва аз натиҷаи кори Вазорат ва сохтору идораҳои тобеи он дар нимсолаи аввали соли ҷорӣ ошно гардиданд. Гуфта шуд, ин тасмим ҷиҳати татбиқи саривақтии дастуру супоришҳое, ки аснои ироаи паёми Сарвари давлат ба Маҷлиси Олӣ дар назди Вазорат гузошта шуда буданд, гирифта шудааст. Ҳамчунин, барои рӯзноманигорон имкон фароҳам оварда шуд, то бо сардорони ниҳодҳои тобеи Вазорат дидору гуфтушунид намуда, ба суолҳои худ посух гиранд. Дар охир Вазири меҳнат ва ҳифзи иҷтимоии аҳолии мамлакат Маҳмадамин Маҳмадаминов дар ҳузури намояндагони ВАО аз фаъолияти семоҳаи Вазорат як навъ натиҷагирӣ намуда, даир ба фаъолияти густурда ва фарохи ниҳодҳои тобеи он маълумот дод. Дар баробари ин, вазир ба суолҳои рӯзноманигорон посухҳои дақиқу мушаххас дод.