Намояндаи ҳизби аграрӣ ба курсии вакилӣ нишаст

Душанбе, 15 май.(АМИТ «Ховар», Марзия Саидова).-Намояндаи 46-солаи ҳизби аграрии Тоҷикистон Зайнуддин Сафаров имрӯз бо қарори Маҷлиси намояндагони Маҷлиси Олии ҷумҳурӣ узви Кумитаи Маҷлиси намояндагони Маҷлиси Олии Ҷумҳурии Тоҷикистон оид ба масъалаҳои аграрӣ, захираҳои об ва замин интихоб гардид. Мавсуф 5 май дар интихоботи миёнадавраии ҳавзаи интихоботии Восеъ №39 бо гирифтани 73,2% -и раъйи интихобкунандагон вакили Маҷлиси намояндагон интихоб гардид. З. Сафаров дорои ду маълумоти олӣ дар бахши кишоварзӣ ва ҳуқуқшиносӣ буда, хатмкардаи Донишгоҳи кишоварзӣ ва Донишгоҳи миллии Тоҷикистон аст. Номбурда то ин вақт дар вазифаи муовини директори Агентии таъмини амволи махсуси Вазорати рушди иқтисод ва савдо фаъолият мекард.