Пирӯзиҳои занҳои ихтироъкор аз Ҷумҳурии Тоҷикистон

Душанбе, 13 май.(АМИТ «Ховар»,Фарзона Достонзода).- Аз 1 то 4 майи соли 2013 дар шаҳри Сеули Ҷумҳурии Кореяи ҷанубӣ шашумин Намоишгоҳи байналмилалии «Занҳои ихтироъкор ва соҳибкори байналмилалӣ» баргузор гардид ,ки дар намоишгоҳи мазкур аз 30 давлат 216 адад патент ба ихтироъ пешниҳод карда шуд. Тавре ки ба АМИТ «Ховар» аз Муассисаи давлатии Маркази миллии патенту иттилооти Вазорати рушди иқтисод ва савдои Ҷумҳурии Тоҷикистон иттилоъ доданд, аз ҷониби Тоҷикистон 6 адад патент ба ихтироъ, ки муаллифонашон занҳои ихтироъкори тоҷик буданд, пешниҳод карда шуд. Аз ҷониби Комиссияи тадорукот ба ду адад патент ба ихтироъ дар соҳаи тиб (муаллифаш Боқиева Гулбаҳор) медали тилло, ба ду адад патент ба ихтироъ медали нуқра (муаллифаш Раҳимова Мубошира) дар соҳаи экология ва хоҷагии қишлоқ ва як адад патент ба ихтироъ дар соҳаи химия (муаллифаш Раҳимова Мубошира) дар соҳаи кимиё ва як адад патент ба ихтироъ муаллифаш (Мансурова Д) дар соҳаи механика супорида шуд. Инчунин аз ҷониби Созмони умумиҷаҳонии моликияти зеҳнӣ ба зан-ихтироъкори тоҷик Боқиева Гулбаҳор «Мукофоти махсус»-и Созмони умумиҷаҳонии моликияти зеҳнӣ супорида шуд. Ин бори дуввум аст, ки бонувон-ихтироъкорони тоҷик дар чунин намоишгоҳи байналмилалӣ иштирок намуда, соҳиби медалҳо ва ҷоизаҳои махсус мегарданд. Барои иштироки фаъолона дар 5-умин семинари байналмилалии «Занҳои ихтироъкор ва соҳибкор дар соҳаи моликияти зеҳнӣ» сардори шуъбаи феҳристҳои давлатии объектҳои моликияти саноатии Муассисаи давлатии Маркази миллии патенту иттилооти Вазорати рушди иқтисод ва савдои Ҷумҳурии Тоҷикистон Парвина Абидова соҳиби «Сертификати байналмилалӣ» гардид. Намоишгоҳи байналмилалӣ бо дастгирии Идораи патентии Кореяи Ҷанубӣ ва Ассотсиатсияи занҳои ихтироъкори Кореяи Ҷанубӣ ва Созмони умумиҷаҳонии моликияти зеҳнӣ баргузор карда шуд.