Вохӯрии Н. Зоҳидов бо ҳайати Норвегия

Душанбе, 2 май (АМИТ «Ховар»).-30 апрели соли 2013 мулоқоти муовини вазири корҳои хориҷии Ҷумҳурии Тоҷикистон Низомиддин Зоҳидов бо ҳайати Шоҳигарии Норвегия бо роҳбарии сафири ҳамин кишвар ҷаноби Оле Йохан Бёрной барпо гардид. Ҳамчунин сафирро дар вохӯрӣ кормандони Вазорати корҳои хориҷии Норвегия ҳамроҳӣ карданд. Дар вохӯрӣ ҷонибҳо таваҷҷуҳи худро ба масъалаи ҳамкории ду кишвар дар соҳаи гидроэнергетика бо назардошти иқтидори обии Тоҷикистон ва таҷрибаи Норвегия равона намуданд. Зикр шуд, ки татбиқи лоиҳаҳои энергетикӣ (сохтмони НОБ-ҳои хурд) дар Тоҷикистон ва таъмини Ҷумҳурии Афғонистон бо қувваи барқ яке аз масъалаҳои муҳими рӯз мебошад. Дар хатми вохӯрӣ масъалаи тақвияти ҳамкориҳои иқтисодию тиҷоратии ду кишвар низ баррасӣ гардид ва тарафҳо ба мувофиқа омаданд, ки пояи қарордодиву ҳуқуқии ду кишвар бояд ташаккул ёбад. Инчунин мавзӯи амнияти минтақавӣ ва баровардани қувваҳои Нерӯҳои эътилофи байналмилалӣ аз Афғонистон мавриди баррасии тарафҳо қарор гирифт.