Вохӯрии вазири корҳои хориҷии Тоҷикистон бо сафири Олмон

Душанбе, 24 май (АМИТ «Ховар»).- 23 майи соли 2013 вазири корҳои хориҷии Ҷумҳурии Тоҷикистон Ҳамрохон Зарифӣ бо хонум Дорис Ҳертрампф бинобар ба итмом расидани ваколаташ дар ҳайси Сафири Ҷумҳурии Федеративии Олмон дар Ҷумҳурии Тоҷикистон мулоқоти хотимавӣ анҷом дод. Зимни вохӯрӣ тарафҳо қаноатмандии худро роҷеъ ба муносибатҳои дуҷонибаи Тоҷикистону Олмон тайи чанд соли охир изҳор карда, умедвории худро аз рушд ва таҳкими ин муносибатҳо баён намуданд. Дар фарҷоми мулоқот вазири корҳои хориҷӣ ба хонум Дорис Ҳертрампф дар фаъолияти ояндаи касбиаш муваффақиятҳоро таманно кард.