Д. Мезенсев: «Созишномаҳо ба нафъи кишварҳо татбиқ мешаванд»

Душанбе, 21 июн. (АМИТ «Ховар», Афшини Муқим).- Зимни мулоқоти Президенти Ҷумҳурии Тоҷикистон Эмомалӣ Раҳмон ва Дабири кулли Созмони ҳамкории Шанхай Дмитрий Мезенсев, ки бо сафари расмӣ дар Тоҷикистон қарор дорад, масоили вобаста ба ҳамкориҳои гуногунсоҳаи Тоҷикистон бо ин созмони бонуфуз баррасӣ гардиданд. Ба иттилои Дмитрий Мезенсев дар ин дидор мавзӯи омодагӣ ба ҳамоиши навбатии сарони кишварҳои аъзои созмон, ки дар назар аст, соли ҷорӣ дар Бишкек баргузор гардад, муҳокима шудааст. Номбурда аз сатҳи ҳамкориҳо бо Тоҷикистон дар бахшҳои сиёсат, амнияти минтақавӣ, мубориза бо гардиши ғайриқонунии маводи мухаддир ва дигар бахшҳо изҳори қаноатмандӣ карда, итминон намуд, ки созишнома ва санадҳои батасвибрасанда аснои баргузории ҳамоишҳои созмон ба нафъи кишварҳои аъзо татбиқ хоҳанд шуд. Дмитрий Мезенсев бо намояндагӣ аз Созмони ҳамкории Шанхай ҳавасмандии ин Созмонро ба густариши ҳарчи бештари ҳамкориҳои созанда бо кишварҳои аъзо, алалхусус бо Тоҷикистон баён дошт.