Минтақаи хизматии милитсия дар Ховарон

Душанбе, 24 июн. (АМИТ «Ховар» Махина Сафоева). — 21 июн дар маҳаллаи Ховарони пойтахт бинои нави Минтақаи хизматии милитсияи ШВКД дар ноҳияи Шоҳмансур мавриди истифода қарор гирифт. Дар маросими кушодашавии бинои нави Минтақаи хизматии милитсия вазири корҳои дохилӣ генерал-лейтенанти милитсия Рамазон Раҳимов, раиси ноҳияи Шоҳмансур Самандар Бобоев ва дигар шахсони расмиву аҳли ҷамоатчигии маҳаллаи Ховарон иштирок намуданд. Рамазон Раҳимов кормандони милитсияро бо кушодашавии бинои мазкур табрик намуда, иброз дошт, ки фаъолияти милитсия бояд шаффоф бошад, то амнияти шаҳрвандонро таъмин намояд. Мавриди зикр аст, ки бинои мазкур аз 2 ошёна иборат буда, бо дастури вазири корҳои дохилӣ ҷиҳати иҷроиши Фармони Президенти Ҷумҳурии Тоҷикистон «Дар бораи тадбирҳои баланд бардоштани нақши нозирони минтақавии милитсия дар таъминоти тартиботи ҷамъиятӣ ва тавсеаи ҳамкории онҳо бо аҳолӣ» бо мақсади тақвият бахшидани фаъолияти нозирони минтақавии милитсия дар таъмини тартиботи ҷамъиятӣ ва амнияти шаҳрвандон, сохта ба истифода дода шуд.