Вохӯрии муовини вазири корҳои хориҷии Тоҷикистон бо ҳайати Лаҳистон

Душанбе, 6 июн. (АМИТ «Ховар»).- 5 июни соли 2013 вохӯрии муовини вазири корҳои хориҷии Чумҳурии Тоҷикистон Низомиддин Зоҳидов бо ҳайати Ҷумҳурии Лаҳистон бо сарварии муовини вазири корҳои хориҷии ин кишвар хонум Катаржина Пелческа-Налеч баргузор гашт. Хонум Пелческа-Налечро Сафири Ҷумҳурии Лаҳистон дар Ҷумҳурии Тоҷикистон бо қароргоҳаш дар шаҳри Тошканд Марян Пшездзетски ва дигар шахсони расмӣ ҳамроҳӣ карданд. Зимни вохӯрӣ ҷонибҳо масъалаҳои рушди муносибатҳои дуҷонибаро мавриди баррасӣ қарор дода, аз татбиқи лоиҳаҳои иқтисодие, ки бо кӯмаки Ҳукумати Ҷумҳурии Лаҳистон дар Тоҷикистон амалӣ мешаванд, изҳорӣ қаноатмандӣ намуданд. Масъалаҳои рушди ҳамгироии минтақавӣ ва дурнамои вазъият дар Афғонистон дар пасманзари хуруҷи қувваҳои эътилофи зиддитеррористӣ аз ин кишвар дар соли 2014 низ мавриди табодули назари ҷонибҳо қарор гирифтанд. Зимни мулоқот тасмими ду кишвар ба роҳандозии ҳамкориҳои судманд дар чаҳорчӯби созмонҳои байналмилалӣ таъкид гардид.