Вохӯрии вазири корҳои хориҷии Тоҷикистон бо сафири Фаронса

Душанбе, 4 июн. (АМИТ «Ховар»).- 3 июни соли 2013 мулоқоти вазири корҳои хориҷии Ҷумҳурии Тоҷикистон Ҳамрохон Зарифӣ бо Сафири Фавқулодда ва Мухтори Ҷумҳурии Фаронса дар Тоҷикистон Дидйе Леруа баргузор гардид. Дар мулоқот ҷонибҳо доираи васеи масъалаҳо, аз ҷумла, масоили вобаста ба ифтитоҳи расмии Сафорати Ҷумҳурии Тоҷикистон дар шаҳри Париж, инчунин вазъи феълии сохтмони манораи назоратию диспетчерӣ ва терминали нави «Фурудгоҳи байналмилалии Душанбе»-ро мавриди муҳокима қарор доданд. Ҷонибҳо инчунин мавзӯи хуруҷи низомиёни Фаронса аз ҳудуди Ҷумҳурии Тоҷикистон то соли 2014-ро муҳокима намуданд.