Дастаи 122-нафараи Тоҷикистон дар бозиҳои умумиҷаҳонии донишҷӯён ширкат хоҳад кард

Душанбе, 8 июл. (АМИТ «Ховар», Ибодат Давлатова).- Аз 6 то 17 июли соли ҷорӣ дар шаҳри Қазони Федератсияи Русия бозиҳои умумиҷаҳонии донишҷӯён аз рӯи 40 намуди варзиш баргузор мегардад. Дар чорабинии мазкур иштироки 13000 варзишгари синну соли аз 17 то 28 сола аз 170 давлати ҷаҳон дар назар аст.Бори нахуст ширкати варзишгарони тоҷик аз рӯи 11 намуди варзиш пешбинӣ шудааст. Бо назардошти дастовардҳо ва таклифи мутахассисон барои иштирок дар ин чорабинӣ дастаи 122- нафараи Тоҷикистон ки 86 варзишгар, 28 мураббӣ, 2 довар ва 3 намоянда шомили он мебошанд, сафарбар хоҳад шуд. «Айни замон аз ҷониби Кумитаи ҷавонон, варзиш ва сайёҳии назди Ҳукумати ҶТ барои дар сатҳи касбӣ омода намудани варзишгарон ҷиҳати иштирок дар ин чорабини бонуфуз ҷамъомадҳои машқиву таълимии варзишӣ оид ба бокс, намудҳои гуштинӣ дзюдо, тарзи озод ва юнонӣ-румӣ пешбинӣ шудааст»- қайд гардид дар нишасти матбуотии кумитаи мазкур.