Кумитаи ҳифзи муҳити зист маҳалҳоро пок месозад

Душанбе, 16 июл. (АМИТ «Ховар» Зарангез Латифова).- Ҷиҳати ҳифз ва аз партовҳо тоза нигоҳ доштани маҳалҳои аҳолинишин ва соҳили дарёву каналҳо амалиётҳои умумиҷумҳуриявии ҳармоҳаи «Тозагии маҳал» ва «Тозагии соҳил» гузаронида мешавад, ки ин ба раванди покдории муҳити зисти атроф мусоидат мекунад. Ин нуктаро Талбак Салимов, раиси Кумитаи ҳифзи муҳити зист имрӯз зимни нишасти матбуотӣ иброз дошт. Ӯ зикр намуд, ки дар ҷараёни амалиётҳои мазкур бештар аз 184 ҳазор нафар сокинони маҳал, донишҷӯён ва кормандони корхонаҳову ташкилотҳо иштирок намуда, зиёда аз 1152 километр соҳили дарёҳо, каналҳои магистралӣ, обанборҳо, ҷӯйборҳо ва дигар мавзеъҳои обҳои тозаро пок сохта, беш аз 7372 метри кубӣ партовҳои гуногун ба партовгоҳҳои расмӣ бароварда шуданд.