Умри пурсамар

Шаҳринав, 22 июл.(АМИТ «Ховар», Ҳотам Рабиев).- Нашриёти «Офсет-Империя» китоби нави шоир, олим, ромишгар ва муҳаққиқи шинохта Сайфиддин Акрамзодаи Тӯдаиро таҳти унвони «Дарёи эҳсон» бо теъдоди ҳазор нусха дастраси хонандагон намуд. Китоб фаъолияти пурсамари байтор-зооветеринари номии ҷумҳурӣ, шоир, Корманди шоистаи Тоҷикистон Абдухолиқ Қосимзодаро рӯи чоп овардааст. Муаллиф тамоми паҳлуҳои зиндагии ин шахсияти илмдӯсту фарҳангпарварро ҳам дар шакли назм –достон ва ҳам дар шакли наср тасвир намуда, шиносоӣ ва дӯстии ӯро бо шахсиятҳои машҳури ҷумҳурӣ баён намудааст. Китоби «Дарёи эҳсон»-ро метавон як асари таърихӣ, илмӣ ва адабӣ ном бурд. Қиммати асари мазкур, ки беш аз 700 саҳифаро дар бар гирифтааст, боз дар он аст, ки дар он асари «Асрори худӣ»-и Муҳаммадиқболи Лоҳурӣ пурра нашр ёфтааст.