Усули биологӣ- ҳифзкунандаи муҳити зист

Восеъ, 27 июл. (АМИТ «Ховар», С. Холов).-Таҷрибаи ҷаҳонии хоҷагидорӣ нишон дод, ки кӯшишҳои паст кардани сатҳи зиёноварии организмҳо ба истифодаи яккарата ва бисёркаратаи воситаҳои химиявӣ натичахои дилхоҳ надода, баръакс як қатор паёмадҳои манфӣ ба бор овард. Аз ин рӯ дар Тоҷикистон дигарбора аз усули биологӣ, хусусан ҳашароти фоидаовар истифода бурда мешавад. Бо мақсади дастгирии кишоварзон дар ноҳияи Восеъ ташкилоти ҷамъиятии «Дурандеш» лабараторияи биологӣ ташкил намудааст, ки дар он мутахассисони соҳа намудҳои гуногуни ҳашароти фоидаоварро парвариш мекунанд. Ҳашароти фоидаовар, ки бар зидди ҳашароти зараррасон пешбинӣ шудааст, дар заминҳои кишти пахта ва дигар махсулоти кишоварзӣ истифода мешаванд. Мутахассисон вобаста ба пайдоиши ҳашароти зараррасон дар заминҳои кишоварзӣ миқдори муайяни ҳашароти фоидаоварро мегузоранд ва ба деҳқонон тарзи гузоштани ҳашаротро меомӯзанд. Бояд зикр намуд, ки дар соли 2009 фақат 20 хоҷагихои деҳқонӣ ва инфиродӣ барои истифодаи усули биологӣ бо ҳашароти фоидаовар бо ташкилоти «Дурандеш» ҳамкорӣ кардаанд ва дар соли 2012-2013 шумораи хоҷагиҳо ба сад адад расида, майдони 600 гектар коркард шудааст. Бартарии дигари усули биологӣ дар он аст, ки ба муҳити зист зарар намерасонад ва ба пастравии пайдоиши бемориҳои сироятӣ дар байни аҳолӣ низ мусоидат мекунад.