Душанбе-1 барандаи Ҷоми Ғуломҳайдаров гардид

Душанбе, 22 август.(АМИТ «Ховар», Фарзона Ашӯрмадова)- Дастаи наврасони Душанбе-1 барандаи Ҷоми Владимир Ғуломҳайдаров дар мусобиқаи ҷумҳуриявӣ оид ба футбол миёни наврасон гардид.Дар ин мусобиқаи ҷумҳуриявӣ, ки бори аввал барои ҷоизаи Мураббии шоистаи Тоҷикистон Владимир Ғуломҳайдаров баргузор мешавад, футболбозони солҳои таваллудашон 2000-2001 иштирок карданд. Дар мусобиқаи мазкур, ки дар майдони сунъии Варзишгоҳи марказии ҷумҳуриявии пойтахт баргузор шуд, ҳашт даста дар ду гуруҳ рақобат намуданд. Аз ҳар ду гуруҳ ду дастаи беҳтарин ба даври ниманиҳоӣ роҳ ёфтанд. Дар даври ниҳоӣ, ки дирӯз баргузор шуд, дастаи Душанбе-1 бо дастаи Суғд рақобат карда, бо ҳисоби 5 бар 2 пирӯз шуд ва барандаи Ҷоми мазкур гардид.