Тасдиқи нақшаи тақвимии чорабиниҳо оид ба омодагӣ ва баргузории интихобот

Душанбе, 31 август.(АМИТ «Ховар», Марзия Саидова).-Нақшаи тақвимии чорабиниҳои асосӣ доир ба таёрӣ ва гузаронидани интихоботи Президенти Ҷумҳурии Тоҷикистон 31 августи соли 2013 дар ҷаласаи Комиссияи марказии интихобот ва раъйпурсии Ҷумҳурии Тоҷикистон /КМИР/, ки таҳти раёсати Шермуҳаммади Шоҳиён — раиси КМИР доир шуд, тасдиқ гардид. Нақшаи тақвимӣ ҷиҳати омодагӣ ва баргузории интихоботи Президенти Ҷумҳурии Тоҷикистон аз 26 банд иборат буда, он фарогири чорабиниҳои асосӣ марбут ба баргузории интихоботи Президенти Ҷумҳурии Тоҷикистон аст. Дар ҷаласа ҳамзамон аъзои КМИР тартиб ва мӯҳлати ҷамъоварии имзои шаҳрвандон ба тарафдории номзади пешбаришаванда ба мансаби Президенти Ҷумҳурии Тоҷикистонро муқаррар ва тасдиқ намуданд. Масъалаи дигаре, ки дар меҳвари муҳокимаи аъзои КМИР қарор дошт, ин ташкил кардани ҳавзаҳои интихоботӣ оид ба интихоботи Президенти Ҷумҳурии Тоҷикистон маҳсуб меёфт. Зикр гардид, ки дар 68 шаҳру навоҳии Тоҷикистон 68 ҳавзаҳои интихоботӣ ҷиҳати баргузории интихоботи Президенти Ҷумҳурии Тоҷикистон ташкил карда мешаванд. Ба дахли ин масъала Шермуҳаммади Шоҳиён –раиси КМИР таъкид кард, ки ҳавзаҳои интихоботӣ дар Ҷумҳурии Тоҷикистон бо назардошти сохти марзиву маъмурии Ҷумҳурии Тоҷикистон ташкил мегарданд. Инчунин дар ҷаласа масъалаи меъёри намояндагӣ, тартиби ташкил ва гузаронидани ҷаласаи намояндагони Маҷлисҳои вакилони халқи шаҳру ноҳияҳои тобеи ҷумҳурӣ доир ба пешбарӣ намудани номзад ба мансаби Президенти Ҷумҳурии Тоҷикистон матраҳ ва тасдиқ шуд. Ҳамзамон, бо қарори КМИР Маркази матбуотии КМИР дар давраи омодагӣ ва баргузории интихоботи Президенти Ҷумҳурии Тоҷикистон созмон дода шуд. Нурулло Маҳмадуллоев- аъзои КМИР роҳбари Маркази матбуотӣ ва аъзои дигари КМИР Акбаралӣ Сатторов, ки ҳамзамон раиси Иттифоқи журналистони Тоҷикистон аст, муовини роҳбари Маркази матбуотиии КМИР тасдиқ шуданд. Маркази матбуотии КМИР иборат аз 9 нафар буда, онҳо хабарнигорони васоити ахбори омма мебошанд.