Ба деҳаи куҳӣ оби тоза меояд

Восеъ, 12 сентябр. (АМИТ «Ховар», С. Холов).- Сокинони деҳаи Истиқлоли ҷамоати деҳоти Тугараки ноҳияи Восеъ солҳост, ки аз оби тозаи ошомиданӣ маҳруманд. Бо пешниҳоди ҳокимияти давлатии ноҳия ва дастгирии ҳокимияти давлатии вилояти Хатлон ин масъала вақтҳои наздик ҳалли худро меёбад. Тавассути ташкилоти «Корезлоиҳа»-и шаҳри Душанбе лоиҳаи хати оби мазкур, ки дарозиаш 7100 метрро ташкил медиҳад, тарҳрезӣ гардида, лоиҳаи он ба маблағи 50 ҳазор сомонӣ омода шудааст. Дар назар аст, ки об тавассути 4 насоси обкаш ба деҳаи мазкур расонида шавад. Сохтмони мазкур оғоз ёфта, корҳои заминканӣ алҳол идома доранд. Инчунин корҳои барқароркунии хатҳои оби нўшокии маркази шаҳраки Восеъ низ шуруъ гардида, бо суръат идома доранд. Тавассути маблағгузории Бонки ҷаҳонии рушд бо ин мақсад 1 миллиону 329 ҳазор доллар чудо гардида, дар масофаи 8,5 километр қубурҳои собиқа иваз карда шуда, 4 маҳаллаи марказӣ ва се маҳаллаи навбунёди шаҳрак бо об таъмин мегардад.