Чорабинии сатҳи баланди Маҷмаи Умумии СММ дар масъалаҳои Ҳадафҳои рушди ҳазорсола

Душанбе, 26 сентябр. (АМИТ «Ховар»).- 25 сентябри соли 2013 дар Ню Йорк чорабинии сатҳи баланди Маҷмаи Умумии СММ дар масъалаҳои Ҳадафҳои рушди ҳазорсола (High-level event on Millenium Development Goals), ки дар он ҳайати Тоҷикистон таҳти сарварии Сарвазири кишвар Оқил Оқилов ширкат кард, баргузор гардид. Оқил Оқилов дар суханронии худ оид ба талошҳои Ҳукумати Тоҷикистон дар истифодаи имкониятҳои мавҷуда ҷиҳати расидан ба Ҳадафҳои рушди ҳазорсола тамаркуз намуда, изҳор дошт, ки дар айни ҳол Тоҷикистон ҷиҳати фароҳамсозии фазои мусоид барои сармоягузорӣ, татбиқи мутавозини сиёсати буҷетӣ ва таъмини шуғли аҳолӣ кӯшишҳо ба харҷ медиҳад. Қайд гардид, ки яке аз санадҳои муҳим дар татбиқи ин ҳадафҳо «Стратегияи миллии рушди Ҷумҳурии Тоҷикистон то соли 2015» мебошад.