Дастури Қоҳир Расулзода ба роҳбарони навоҳии пахтакор

Душанбе, 20 сентябр. (АМИТ «Ховар», Зарангези Латиф).- Дирӯз бо иштироки раиси вилояти Суғд Қоҳир Расулзода ва муовинони раиси вилоят, раисони шаҳру ноҳияҳо ва роҳбарони як силсила ташкилоту идораҳои вилоятӣ ҷаласаи корӣ доир гашт. Тибқи иттилои дафтари матбуоти раиси вилоят дар ин ҷаласа Қоҳир Расулзода аз натиҷаҳои сафари кории Президенти Ҷумҳурии Тоҷикистон Эмомалӣ Раҳмон ба вилояти Суғд ёдовар гардида, таъкид дошт, ки он дар сатҳи баланди омодагӣ, сарҷамъӣ ва болидаруҳии сокинони вилояти Суғд баргузор гардид. Раиси вилоят роҳбарони сохторҳои соҳавии вилоятиро вазифадор намуд, ки ҷиҳати дар сатҳи баланди корбарӣ нигоҳ доштани иншооти дар ҷараёни ин сафар мавриди истифода қароргирифта, аз ҷумла Кӯдакистони Президентӣ, мактабу беморхонаҳо, маҷмааи истироҳатӣ ва варзишгоҳи нав дар шаҳру ноҳияҳои Ашту Спитамен, Бобоҷон Ғафуров, Чкалов ва Хуҷанд тадбирҳои амалӣ андешанд. Ҳамчунин дар ҷаласаи корӣ ҷараёни корҳои кишоварзӣ, махсусан ҷамъоварии беталафи ҳосили имсолаи пахта мавриди баррасӣ қарор дода шуд. Аҳмадҷон Қобилов, муовини раиси вилоят дар гузориши хеш зикр намуд, ки то имрӯз кишоварзон ба корхонаҳои коркард нисбат ба ҳамин давраи соли гузашта 19,3 ҳазор тонна кам пахта супоридаанд. Тибқи ин гузориш то имрӯз дар миқёси вилоят 40 хоҷагии деҳқонӣ нақшаи барномавии имсоларо дар ноҳияҳои Мастчоҳ, Б.Ғафуров, Зафаробод, Спитамен, Ашт ва Ҷ. Расулов амалӣ намудаанд. Қоҳир Расулзода зимни баррасиии ин масъала дастур дод, ки ноҳияҳои пахтакори вилоят бо истифода аз қувваҳои дохилӣ, бахусус саҳмдорон суръати чиниши ҳосилро вусъат бахшида, барои таъмини иҷрои нақшаи барномавӣ тадбирҳои мушаххас андешанд.