Вохӯрии сеюми коршиносони мақомоти зиддимухаддиротии ташаббуси АҚТ

Душанбе, 28 сентябр. (АМИТ «Ховар», Лутфия Эшонқулова).-27-28 сентябр дар Агентии назорати маводи нашъаовари назди Президенти Ҷумҳурии Тоҷикистон ҷаласаи коршиносони мақомоти зиддимухаддиротии Ҷумҳурии Исломии Афғонистон, Ҷумҳурии Қирғизистон ва Ҷумҳурии Тоҷикистон — ташаббуси АҚТ баргузор гардид, ки дар он намояндагони Раёсати СММ оид ба ҷинояткорӣ ва мухаддирот ширкат варзиданд.Тавре ки маркази матбуоти АНМН хабар медиҳад, 27 сентябр дар сухани ифтитоҳӣ муовини директори агентӣ Бунафша Одинаева зикр намуд: ” Бо мақсади ба ҳам овардани кӯшишҳо дар мубориза бо муомилоти ғайриқонунии маводи мухаддир ва баланд бардоштани самаранокии он Ҷумҳурии Тоҷикистон ба таври ҳамешагӣ ҳамкориҳоро бо давлатҳо ва созмонҳои дахлдор ҳамаҷониба рушд ва таҳким мебахшад”.Мақсади асосии ҷаласа- ин омода намудани ҳуҷҷатҳо доир ба баланд бардоштани самаранокии ҳамкорӣ дар самти мубориза бо муомилоти ғайриқонунии маводи нашъаовар ва идора байни сарҳадоти ҶИА, Қирғизистон ва Тоҷикистон мебошад. Ҳуҷҷатҳои мазкур барои баррасӣ дар вохӯрии навбатии вазирон-роҳбарони мақомоти зиддимухаддиротии Афғонистон, Қирғизистон ва Тоҷикистон, ки дар шаҳри Бишкек баргузор мегардад, пешниҳод мешаванд.Дар ҷамъбасти ҷаласа Протоколи муштарак ба имзо мерасад. Вохӯрии сеҷониба дар доираи татбиқи «Барномаи минтақавии Раёсати СММ оид ба маводи мухаддир ва ҷинояткорӣ барои Афғонистон ва кишварҳои ҳамсояи он дар солҳои 2011-2014” баргузор мегардад.