Ба ранги сабз гузар!

Душанбе, 2 октябр. (АМИТ «Ховар», Фарзона Ашӯрмадова).- «Ба ранги сабз гузар» таҳти чунин шиор имруз дар роҳҳои марказии пойтахт рӯйдоди таблиғотӣ оғоз шуд. Дар ин рӯйдод, ки ба ибтикори ширкати «МегаФон» соли сеюм аст доир мешавад, кормандони Раёсати Бозрасии давлатии автомобилии Вазорати корҳои дохилии кишвар ва намояндагони ВАО ширкат карданд. Ширкаткунандагони рӯйдоди «Ба ранги сабз гузар» пиёдагардонро аз роҳ гузаронда, ҳамзамон барояшон қоидаҳои ҳаракат дар роҳҳоро ёдовар шуданд. Кормандони Раёсати БДА бо мошинҳои махсус аз тариқи баландгӯ ронандагонро ба риояти усули ронандагӣ ва фарҳанги ҳаракат дар роҳҳо ташвиқ карданд. Бино ба гуфтаи яке аз масъулини ширкати «МегаФон», таваҷҷуҳи ширкати мазкур ба масоили ҳаракат дар роҳ тасодуфӣ нест: Шаҳрвандони хурдсоли мо на ҳамеша хатарҳои ҳаракат дар роҳро эҳсос мекунанд. Бино бар ин ширкати «МегаФон» тасмим гирифтааст ба сокинони шаҳрҳои Душанбе, Қурғонтеппа, Хуҷанд ва Исфара қоидаҳои ҳаракат дар роҳро бо истифода аз рӯйдоди «Ба ранги сабз гузар» ёдоварӣ кунад.Амалиёти мазкур бо чунин шиор тӯли ду рӯз- аз 2-юм то 3-юми октябри соли равон гузаронида мешавад.