Фаъолияти пурсамари “Пажуҳишгоҳи меҳнат ва ҳифзи иҷтимоии аҳолӣ”

Душанбе, 28 октябр. (АМИТ «Ховар», Л. Қосимова). – Тавре ки аз Вазорати меҳнат ва ҳифзи иҷтимоии аҳолӣ ба АМИТ «Ховар» хабар доданд, муассисаи давлатии “Пажуҳишгоҳи меҳнат ва ҳифзи иҷтимоии аҳолӣ” монографияи коллективӣ дар мавзўи «Асосҳои назариявӣ ва таҷрибаи ташаккули бозори меҳнат дар шароити иқтисодии гузариш (методология ва институткунонӣ)»-ро таҳия карда, аз чоп баровард. Олимону ходимони ин муассиса дар нуҳ моҳи соли ҷорӣ дар кори зиёда аз 46 конфронсҳо, семинарҳо, мизҳои гирд ва дигар машваратҳои илмӣ иштирок карда, Кодекси этикаи коркуни иҷтимоӣ ва 13 мақолаи илмӣ ба табъ расониданд. Муассисаи давлатии “Пажуҳишгоҳи ташхис ва барқароркунии қобилияти кории маъюбон бо табобатгоҳ” дар ин давра доир ба ҷабҳаҳои гуногуни соҳаи тиб 3 конфронси амалӣ барои донишҷўён ва кормандони миёнаи тиббӣ дар мавзўи “Растаниҳои шифобахш барои табобати бемориҳои дил”, “Тибби тасдиқкунанда дар фаъолияти кормандони миёнаи тиббӣ” ва “Усулҳои тибби шарқ барои табобати бемориҳои ҳозима” ва барои донишҷуёни ихтисоси тавонбахшии тиббӣ дар мавзўи “Ёрии паллиативӣ” семинар гузаронида, ба ду рисолаи номзадӣ, ду дастури методӣ ва 10 мақолаи илмӣ тақриз омода кард.