Мизи мудаввар дар Вазорати меҳнат ва ҳифзи иҷтимоии аҳолии ҶТ

Душанбе, 7 октябр. (АМИТ «Ховар», Л. Қосимова). -Дар Вазорати меҳнат ва ҳифзи иҷтимоии аҳолии Ҷумҳурии Тоҷикистон дар мавзўи «Натиҷаҳои ба даст овардаи Лоиҳа дар давраи аз моҳи июни соли 2012 то октябри соли 2013» бо Лоиҳаи муштараки Вазорати меҳнат ва ҳифзи иҷтимоии аҳолии Ҷумҳурии Тоҷикистон, Барномаи Рушди СММ ва Ташкилоти Байналмилалии Меҳнат (бо маблағгузории Хазинаи глобалӣ) оид ба пешгирии ВНМО/БПНМ мизи мудаввар баргузор гардид. Тибқи Созишномаи байни Вазорати меҳнат ва ҳифзи иҷтимоии аҳолии ҶТ ва Барномаи Рушди СММ дар бораи татбиқи Барномаи «Паст намудани сатҳи болоравии бемории ВНМО/АНММ (ВИЧ/СПИД) дар Тоҷикистон» ва бо кўмаки молиявии Хазинаи глобалӣ Барномаи пешгирии ВНМО/АНММ дар байни муҳоҷирони меҳнатӣ ва оилаи онҳо аз соли 2005 то ҳол дар 5 шаҳру ноҳияи ҷумҳурӣ- Исфара, Рўдакӣ, Варзоб, Шаҳритус, Ҳамадонӣ ва аз соли 2009 дар 5 шаҳру ноҳия- Қайроққум, Норак, Бохтар, Данғара ва Шаҳринав амалӣ мегардад. Мақсади асосии ин барнома ҳиссагузорӣ ва бартарафсозии ВНМО/БПНМ дар байни муҳоҷирони меҳнатӣ ва оилаи онҳо тавассути паҳн намудани маводи иттилоотӣ, дастрасии маводи пешгирикунанда ва додани тавсияҳо оид ба интихоби тарзи ҳаёти солим мебошад.