Муроҷиати 24 ширкати ватанӣ ба озмуни «Бренди сол»

Душанбе, 4 октябр. (АМИТ «Ховар», Фарзона Ашӯрмадова).- То ба имрўз 24 ширкат барои иштирок дар озмуни ҷумҳуриявии «Бренди сол», ки таҳти унвони «Қуллаи шараф» аввалин маротиба дар ҷумҳурӣ гузаронида мешавад, арзнома пешниҳод кардаанд.Тавре аз Муассисаи давлатии «Маркази миллии патенту иттилоот» хабар доданд, Вазорати рушди иқтисод ва савдои Тоҷикистон ба таваҷҷуҳи ширкатҳо, ташкилотҳо, корхонаҳои хурду миёна, соҳибкорони инфиродӣ мерасонад, ки қабули ҳуҷҷатҳо ба озмуни мазкур то 15 октябри соли ҷорӣ идома дошта, хоҳишмандон метавонанд аризаҳои худро бевосита ба Муассисаи давлатии «Маркази миллии патенту иттилоот» ва ё аз тариқи электронӣ ба сомонаи www.tajpatent.tj пешниҳод намоянд.Ба иттилои манбаъ, ғолибони озмун ҳуқуқи истифодаи нишони «Бренди сол»-ро дар молу маҳсулот ва фаъолияти рекламавӣ пайдо менамоянд. Инчунин шахсоне, ки дар озмун ширкат меварзанд доир ба фаъолияташон дар маҷаллаи махсус маълумот нашр мешавад.Дар баробари ин, ҷоизаи махсуси Созмони умумиҷаҳонии моликияти зеҳнӣ «Медали тилло» барои Бренди инноватсионӣ низ пешбинӣ гардидааст. Гуфта мешавад, ки натиҷаи озмун дар охири сол бо иштироки намояндагони вазорату идораҳо ва ташкилотҳои байналмилалӣ доир хоҳад гашт.Ҳадафи баргузории озмуни мазкур-ин ҳавасмандгардонии ширкатҳо оид ба истифода пешбурди бренд дар фаъолияти худ мебошад.