Нашри китоби «Шириншох Шоҳтемур дар таърихи эҳёи давлатдории тоҷикон»

Душанбе, 22 октябр. (АМИТ «Ховар», С. Солех).- Нашриёти “Дониш”- и Академияи илмҳои Точикистон китоби «Шириншоҳ Шоҳтемур дар таърихи эҳёи давлатдории тоҷикон»-ро ба нашр расонид. Он ба қалами рӯзноманигор ва муҳаққиқи шинохтаи тоҷик Қурбон Аламшоев тааллуқ дошта, зери таҳрири муаррихи саршинос Ҳайдаршоҳ Пирумшоев ба нашр расидааст. Асар ба забони русӣ буда, дар ҳаҷми 17 ҷузъи чопӣ ва бо теъдоди 500 нусха аз чоп баромадааст. Он ба 115- солагии Қаҳрамони Тоҷикистон Шириншоҳ Шоҳтемур, ки соли оянда ҷашн гирифта хоҳад шуд, бахшида шудааст. Дар ин асари монографӣ бори нахуст кӯшиши ба таври васеъ омӯхтани ҳаёти кӯтоҳ, вале пурмазмуни Шириншоҳ Шоҳтемур ба харҷ дода шуда, хизматҳои ҳаққонии қаҳрамони миллат баҳои илмӣ гирифтаанд. Барои беҳтар ба хонандагон намоиш додани чеҳраи таърихии Ш.Шоҳтемур ҳамчунин аз корҳои таҳқиқотии арсаи таърих, маводи васоити ахбори омма дар солҳои 20-30-юми асри гузашта, ҳуҷҷатҳои муҳими давлатии сатҳи ҷумҳурӣ ва собиқ шӯравӣ ба таври фаровон ва самаранок истифода шудаанд. Муаллиф дар асоси далелҳои дақиқи таърихӣ кӯшидааст роҳи пурпечутоби шахсӣ ва сиёсии Шоҳтемурро равшан созад. Ҷузъиёти ҳаёти шахсии ин қаҳрамони тоҷик муайян шуда, чӣ тавр ташаккул ёфтани ҷаҳонбинии сиёсии вай амиқан таҳлил гардидааст. Бори нахуст хидматҳои бемисоли Ш.Шоҳтемур дар таъсиси нахустин давлати тоҷикон баъд аз аҳди Сомониён ба қалам дода шуда ширкати Шоҳтемур дар табдили ҷумҳурии мухтори Тоҷикистон ба ҷумҳурии иттифоқӣ пурра нишон дода шудааст. Дар гирди қаҳрамони миллат тасвири илмии ҳаёти сиёсӣ, иҷтимоӣ, маданӣ ва иқтисодии Ҷумҳурии Тоҷикистон дар солҳои 20-30-юми қарни пештара сурат гирифтааст. Дар ин монография, ки аз се боб иборат аст, таърихи халқи тоҷик-маскунони Помир ва Бухорои Шарқӣ дар арафаи Инқилоби Октябр, ғалабаи Инқилоби Октябр дар Туркистон, таърихи таъсиси Тоҷикистони мухтор ва Ҷумҳурии мустақил, бунёд ва рушди пойтахти ҷумҳурӣ-шаҳри Душанбе оварда шудааст. Китоб барои муҳаққиқон ва доираи васеи хонандагон пешбинӣ шудааст.