Шиносоӣ бо бозмондаҳои шаҳраки бостонии Карон дар ноҳияи Дарвоз

Душнабе, 8 октябр (АМИТ «Ховар»).- Нимаи дуюми рӯз Президенти кишвар Эмомалӣ Раҳмон ба ноҳияи Дарвоз ташриф оварда, нахуст бо бозмондаҳои шаҳри бостонии Карон бевосита шинос шуд.Тавре зикр гардид, ин шаҳр тақрибан 4 ҳазор сол пеш бунёд ёфта, ба даврони тамаддуни ориёиёни бостонӣ рост меояд. Маъбадҳое, ки дар натиҷаи ҳафриёти бостоншиносон пайдо шудаанд, аз пайравони оини зардуштӣ будани сокинони ин шаҳр гувоҳӣ медиҳад. Дар он бозмондаҳои маъбади панҷманори оташ, маъбади об, ду маъбади бод, осиёби бодӣ, лавҳи китоби Авасто, майдони калони чавгонбозӣ, маҷлисгоҳҳо ва биноҳои маъмурию истиқоматӣ ба назар мерасанд.Тибқи пешгӯии олимони бостоншинос, боқимондаҳои деворҳои иҳотавӣ аз он гувоҳӣ медиҳанд, ки ин шаҳри ҳокимнишин тақрибан дар масоҳати 100 га доман паҳн намуда будааст.Ба Сарвари давлат Эмомалӣ Раҳмон аз ҷониби шоири шаҳири тоҷик Муъмин Қаноат рамзи таърихии шаҳри Карон, ки нишонаи бостонӣ будани оини шаҳрсозӣ ва давлатдории миллати тоҷик аст, тақдим гардид. Ҳамчунин аз ҷониби олими шинохтаи тоҷик Нодир Одилов дастхати панҷсадсолаи Қуръони Карим ва аз ҷониби собиқадори кор Одил Бердиев ҷома ҳадя карда шуд. Дар ин ҷо, ҳамчунин нусхаҳои нодири китобҳои пурарзиши таърихию фарҳангӣ дар маъраз буданд, ки қисме аз онҳо бо оби тилло навишта шудаанд.
Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.