Афзоиши маҳсулоти корхонаҳои саноати маъдан ва фулузоти қиматбаҳо

Душанбе, 19 ноябр. (АМИТ «Ховар»,  Кристина  Эрлих).- Тайи  10  моҳи  соли равон  дар  кишвар  истеҳсоли  маҳсулоти  корхонаҳои саноати маъдан ва фулузоти  қиматбаҳо зиёд  гардид. Масалан,  дар  ин  муддат  корхонаҳои  саноати  маъдан  ва  сангҳои  қиматбаҳо ба  маблағи 889 миллиону  800 ҳазор  сомонӣ  маҳсулот истеҳсол  кардаанд,  ки  ин 123,7  фоизи  дурнаморо  ташкил  дода,  назар ба  нишондоди  ҳамин  давраи  соли  2012  баробари  130 миллиону 100 ҳазор  сомонӣ  зиёд  аст.  Дар  ин  бора  аз Вазорати  энергетика  ва  саноати  ҶТ  ба  АМИТ «Ховар»  хабар  доданд.
 
Дар  давраи  зикршуда  корхонаҳои  соҳаи  мазкур  то 13  ҳазору  574  тонна  хокаи  сурма, то 2  ҳазору  932  тонна  хокаи  сурбу  нуқра, то 26  ҳазору  926  тонна  сурб ва  48  ҳазору  220 тонна  хокаи  руҳ  истеҳсол  намудаанд. 
 
Қобили  зикр  аст,  ки тайи  10  моҳи  соли  равон   барои рушди  саноати  маъдан  баробари 229 миллиону  300 ҳазор  сомонӣ  маблағгузорӣ  шудааст. 
 
Дар  давраи  ҳисобот маҳсулоти  корхонаҳои  саноати  маъдан  ба  маблағи  умумии  781  миллиону  700  ҳазор  сомонӣ  ба  фурӯш  бароварда шуд.