Баррасии гузариш ба низоми нави баҳодиҳӣ ба дониши хонандагон

Душанбе, 2 ноябр. (АМИТ «Ховар», Раъно Нусратуллоева).-31 октябр дар Академияи таҳсилоти Ҷумҳурии Тоҷикистон конфронси ҷумҳуриявии илмию амалии «Гузариш ба низоми нави баҳодиҳӣ ба дониши хонандагон» доир гардид. Ҳадафи конфронс аз таъмини сифати баланди таълиму тарбия ва сатҳи донишу маърифати хонандагон иборат буд. Дар шароити кунунӣ гузариш ба низоми нави таҳсилот, таҷдиди назар ба меъёрҳои баҳогузорӣ, ба роҳ мондани методологияи наву самарабахши тадрис, истифодаи босамари усулҳои фаъоли таълим аз ҷумлаи равандҳое мебошанд, ки барои ворид гаштан ба фазои ҷаҳонии таҳсилот мусоидат хоҳанд кард.Дар конфронс зикр шуд, ки консепсияи миллии таҳсилот ва дигар санадҳои меъёрии ҳуқуқии Ҷумҳурии Тоҷикистон барои ворид гаштани Ҷумҳурии Тоҷикистон ба фазои ягонаи таҳсилоти байналмилалӣ ва робитаи устувори раванди таҳсилоти миллӣ бо фарҳангу маърифат ва тамаддуни ҷаҳонӣ заминаи устувору мусоид гузошт.