Тарбияи кӯдакон дар кӯдакистон

Ҳисор, 30 ноябр. (АМИТ «Ховар», Ҳотам Рабиев).- Бо ташаббус ва маблағгузории соҳибкори маҳаллӣ Мавҷуда Ҳакимова дар маркази шаҳраки Ҳисор сохтмони кӯдакистони нави замонавӣ барои 70 нафар кӯдак дар арафаи анҷомёбист. Ин соҳибкори баландҳиммат боз мақсад дорад, ки бахшида ба таҷлили ҷашни 3000 — солагии Ҳисор як кӯдакистони дигар барои 70 нафар, як коргоҳи кулолӣ ва як коргоҳи дӯзандагиро барои тайёр намудани армуғонҳои миллӣ бо мақсади ташкили ҷойҳои нави корӣ барои 30 нафар зан ба истифода диҳад.Мавҷуда Ҳакимоваро мардуми Ҳисор ҳамчун ташаббускор, ободгари роҳу кӯпрукҳо, дӯстдор ва ғамхори кӯдакон, маорифпарвару ҳимматбаланд мешиносанд. Маҳз бо кӯмаки ӯ сокинони деҳаҳои Кӯшкаки мурғон, Тошбулоқ, Оқулии боло, Якуми май, деҳаи Ҷангалак ва чандин деҳаи дигар бо оби тозаи ошомиданӣ таъмин шуданд. Ғайр аз ин ӯ сарпарастии бошандагони интернати нобиноён, интернати махсуси кӯдакон, интернати касалиҳои руҳиро низ ба уҳда дорад.