Ҷаласаи навбатии Кумитаи тадорукот оид ба раисии Тоҷикистон дар СҲШ

Душанбе, 10 декабр. (АМИТ «Ховар», Фарзона Ашӯрмадова).- Имрўз дар ҳузури Сарвазири Ҷумҳурии Тоҷикистон Қоҳир Расулзода ҷаласаи навбатии Кумитаи тадорукот оид ба раисии Ҷумҳурии Тоҷикистон дар Созмони ҳамкориҳои Шанхай дар солҳои 2013-2014, омодагӣ ва гузаронидани ҷаласаи навбатии Шўрои сарони давлатҳои узви Созмони ҳамкориҳои Шанхай дар шаҳри Душанбе баргузор гардид. Дар ҷаласа лоиҳаи Нақшаи чорабиниҳои асосӣ ва тадбирҳои омодагӣ ба ин чорабинии муҳими сатҳи баланди байналмилалӣ мавриди баррасӣ қарор дода шуда, бо назардошти таклифу пешниҳодоти аъзои Кумитаи тадорукот такмили нақшаи чорабиниҳои таҳиягардида зарур шуморида шуд. Сарвазири мамлакат аъзои Кумитаи тадорукотро вазифадор кард, ки ҷиҳати татбиқи бандҳои қобили қабули нақшаи чорабиниҳои асосӣ ва тадбирҳои омодагӣ чораҳои зарурӣ дида, барои дар сатҳи баланди омодагию ташкилӣ гузаронидани давраи раёсати Ҷумҳурии Тоҷикистон дар Созмони ҳамкориҳои Шанхай ва ҷаласаи навбатии Шўрои сарони давлатҳои узви созмон тадбирҳои бетаъхир ва зарурӣ андешанд.Ёдрас мешавем, ки дар давраи раёсати Ҷумҳурии Тоҷикистон дар Созмони ҳамкориҳои Шанхай барои солҳои 2013-2014 ташкил ва гузаронидани зиёда аз 36 чорабинии сатҳу зинаҳои гуногуни минтақавию байналмилалӣ дар назар дошта шудааст.