Арзёбии соҳаи сайёҳӣ дар иртибот бо ҳунарҳои дастӣ

Душанбе, 3 декабр.(АМИТ “Ховар”, Ситора Раҷабова).-Маркази тиҷорати байналмилалӣ (МТБ) соҳаи сайёҳиро дар Тоҷикистон дар иртибот бо ҳунарҳои дастӣ арзёбӣ менамояд. Дар доираи ибтикори нави Марказ дар Тоҷикистон самтҳои рушди соҳаи сайёҳии кишвар бо таваҷҷуҳи вижа ба алоқаманд кардани он барои дастгирии табақаҳои ниёзманд муайян карда хоҳад шуд.  Мушовири байналмилалии МТБ доир ба сайёҳӣ Франсуа Лоран дуввумин боздиди худро аз Тоҷикистон дар чаҳорчӯбаи ибтикори сайёҳии МТБ анҷом дод. Ҷаноби Лорен мегӯяд: “Ҳамакнун, ҳама иттилооти лозима доир ба вазъи феълӣ дар соҳаи сайёҳии Тоҷикистон, сиёсатҳо ва барномаҳои мавҷудаи давлатӣ, бозигарони калидии соҳа ва иқтидори рушди соҳа ҷамъоварӣ шудааст ва таҳлил хоҳад гардид”. Ҷаноби Лорен аз шиносоӣ бо соҳаи сайёҳӣ дар Тоҷикистон чунин таассурот бардоштааст: “Тоҷикистон барои рушди соҳаи сайёҳӣ иқтидори бузург дорад. Аз ҷумла, ҳазорон нафарро метавон барои сайёҳат, куҳгардӣ, варзишҳои экстрим ва ғайра ба ин кишвар ҷалб кард.Баҳогузории соҳаи сайёҳии Тоҷикистон дар чаҳорчӯбаи лоиҳаи ба наздикӣ тасдиқшудаи “Тақвияти рақобатпазирии содиротии корхонаҳои хурду миёнаи соҳаи нассоҷиву дӯзандагӣ ва рушди тавоноии ниҳодҳои пуштибони тиҷорат дар Тоҷикистон” гузаронида мешавад. Ин лоиҳа ҷузъе аз Бахши чаҳоруми Барномаи ҳамкориҳо дар соҳаи тиҷорати Идораи давлатии Швейтсария дар умури иқтисод (SECO) дар Тоҷикистон мебошад.