Муаррифии “Куллиёти осор”-и Абдулманнони Насриддин

Душанбе, 30 декабр. (АМИТ «Ховар», Фарзона Ашӯрмадова).-Имрӯз дар Китобхонаи миллии Тоҷикистон “Куллиёти осор”-и шодравон Абдулманнони Насриддин муаррифӣ гардид. “Куллиёти осор” аз ҳафт ҷилд иборат буда, аз китобу рисолаҳои то кунун нашршуда ва ҳам нашр нашуда ва мақолаву ёддоштҳои маҳфуз дар бойгонии муаллиф иборат мебошад. Ҳафт ҷилди китоби мазкур аз “Асари устод Рӯдакӣ”, «Шарҳнигорӣ дар адабиёти форсу тоҷик, ҳамчунин дар бораи матншиносӣ», «Донишмандон ва сухансароёни Хуҷанд», «Достонҳо аз “Бӯстон”-и Саъдӣ», «Шарҳи “Гулистон”-и Саъдӣ ва ҳамчунин Фарҳанги тафсилии “Шамс-ул- луғот”», Тақризҳо ва мақолаҳои Абдулманнони Насриддин ва «Баъзе пораҳо аз ёднома ва сафарномаҳои Абдулманнони Насриддин» иборат аст. Ҳамчунин бо пешниҳоди адабиётшиносон ва иштирокчиёни нишасти мазкур шакли электронии китоб дар хидмати хонандагон гузошта хоҳад шуд.