Омӯзиши 10 навъи гандуми тирамоҳӣ дар баландии 1800 м

Душанбе, 25 декабр. (АМИТ «Ховар», Ситора Раҷабова).- Натиҷаи таҳқиқот оид ба омӯзиши муқоисавии 10 навъи гандуми тирамоҳӣ дар баландии 1800 м ва 2600 м аз сатҳи баҳр муайян намуд, ки навъҳои «Наврӯз» ва «Норман» аз ҷиҳати ҳосилнокӣ аз дигар навъҳо бартарият дошта, навъҳои ояндадор дониста шуданд.Таҳқиқот оид ба гирифтани ҳосили дуюм баъди ҷамъоварии гандуми тирамоҳӣ бо истифодаи кишти помидор, лаблабу, нахӯд, сабзӣ, хардал ва шалғамча гузаронида шуда, дар натиҷа муайян гардид, ки бо ин мақсад дар шароити Помир кишти сабзӣ, хардал, шалғамча ва нахӯди маҳаллӣ самаранок мебошад. Дар пойгоҳи академия дар водии Аличури ноҳияи Мурғоб омӯзиши муқоисавии рушду нумуъ ва афзоиши қутосҳои экотипи помирӣ ва дурагаи онҳо бо зоти қутоси муғулӣ нишон дод, ки вазни миёнаи гӯсолаҳои дурагаи муғулӣ нисбат ба зоти экотипи помирӣ 2,5-3 кг зиёд мебошад. Таҳқиқот оид ба муайян намудани таркиби биохимиявии хуни қутосҳои таҷрибавӣ ва сифати гӯшту шири онҳо идома дорад.Дар ин бора аз Академияи илмҳои кишоварзӣ ба АМИТ «Ховар» хабар доданд.