Парлумон созишномаи қарзии иловагиро тасдиқ менамояд

Душанбе, 9 декабр.(АМИТ „Ховар“, Марзия Саидова).- Имрӯз дар ҷаласаи навбатии Шӯрои Маҷлиси намояндагони Маҷлиси Олии Ҷумҳурии Тоҷикистон, ки таҳти раёсати Шукурҷон Зуҳуров -раиси Маҷлиси намояндагон ҷараён гирифт, маҷмӯи масъалаҳои марбут ба рушди ҳаёти сиёсию иқтисодӣ ва иҷтимоии кишвар мавриди баррасӣ қарор гирифт. Аз ҷумла, аъзои Шӯрои палатаи поёнии Парлумони мамлакат лоиҳаи қонунҳои Ҷумҳурии Тоҷикистон «Оид ба ворид намудани тағйиру иловаҳо ба қонунҳои Ҷумҳурии Тоҷикистон «Дар бораи фаъолияти суғуртавӣ», «Дар бораи муқовимат ба вируси норасоии масунияти одам ва бемории пайдошудаи норасоии масуният», инчунин Созишномаи қарзии иловагӣ байни Ҷумҳурии Тоҷикистон ва Бонки Исломии Рушд /БИР/ оид ба лоиҳаи «Обтаъминкунии шаҳри Душанбе»-ро муҳокима намуданд. Аъзои Шӯро доир ба масъалаҳои баррасишуда, андешаронӣ намуда, моҳияти масъалаҳои баррасишударо тавзеҳ доданд. Дар фарҷом масъалаҳои матраҳгардида ҷиҳати муҳокима ва баррасӣ ба ҷаласаи навбатии иҷлосияи панҷуми Маҷлиси намояндагони Маҷлиси Олии Ҷумҳурии Тоҷикистон даъвати чорум, ки интизор меравад 11 декабр дар Душанбе баргузор шавад, пешниҳод гардиданд.