Таҳқиқи имконияти ҳамгироии сайёҳӣ дар Тоҷикистон

Душанбе, 4 декабр. (АМИТ «Ховар», Фарзона Достонзода).- Маркази байналмилалии савдо имконияти Тоҷикистон дар бахши сайёҳиро арзёбӣ мекунад.Тавре ки аз Маркази байналмилалии савдо ба АМИТ «Ховар» хабар доданд, мушовири байналмилалии маркази мазкур оид ба сайёҳӣ Франсуа Лоран 28 ноябри соли 2013 сафари дуюмашро дар Тоҷикистон, ки ба масоили сайёҳӣ дар кишвар бахшида шуда буд, анҷом дод. Франсуа Лоран моҳи октябр ва моҳи ноябри соли 2013 ба Тоҷикистон ду маротиба сафар карда, аз минтақаҳои асосии сайёҳӣ, аз ҷумла Бадахшон ва водии Зарафшон дидан карда, бо намояндагони ширкатҳои сайёҳӣ ва косибон вохӯрда, бо имкониятҳои кишвар дар бахши сайёҳӣ шинос шуд. Мақсад аз сафарҳои номбурда арзёбии талабот ба сайёҳӣ, ҳамчунин аз нигоҳи техникию иқтисодӣ асоснок намудани ташкили созмонҳои рушди сайёҳӣ буд. Бахши сайёҳии Тоҷикистон дар ҳошияи лоиҳаи ба қарибӣ тасдиқшуда оид ба «Таҳкими рақобатпазирии содиротии корхонаҳои хурду миёнаи соҳаи нассоҷию дӯзандагӣ ва афзун намудани қудрати бахшҳои дастгирии савдо дар Ҷумҳурии Тоҷикистон» арзёбӣ мешавад. Бо истифода аз натиҷаҳои арзёбии зикршуда лоиҳаи нав баҳри дастгирии сайёҳӣ дар Тоҷикистон, ки онро ҳукумати Швейтсария маблағгузорӣ менамояд, таҳия мегардад.