100 медали тиллои варзишгарони тоҷик дар соли 2013

Душанбе, 17 январ. (АМИТ «Ховар»,Фарзона Достонзода).- Дар шаҳру ноҳияҳои кишвар давоми соли гузашта 331 иншооти варзишӣ, аз ҷумла 11 варзишгоҳ, 7 маҷмааи варзишӣ, 3 ҳавзи шиноварӣ, 45 толори варзишӣ, 263 майдончаҳои варзишӣ ва 2 маркази солимгардонӣ ба маблағи зиёда аз 205 369 940 сомонӣ бунёд ва таъмиру таҷдид гардиданд. Дар ин бора 17 январ зимни нишасти матбуотӣ раиси Кумитаи ҷавонон,варзиш ва сайёҳии назди Ҳукумати Ҷумҳурии Тоҷикистон Маликшо Неъматов иттилоъ дод.Ӯ афзуд, ки дар асоси Нақшаи тақвими ягонаи чорабиниҳои оммавӣ, варзишӣ, солимгардонӣ ва иштирок дар мусобиқаҳои байналмилалӣ дар 22 чемпионати Ҷумҳурии Тоҷикистон ва 85 мусобиқаҳои ҷумҳуриявӣ 10087 варзишгар иштирок намуданд, ки аз онҳо 1708 нафарро бонувон ташкил медиҳанд.Мавриди зикр аст, ки дар арсаи байналмилалӣ 1091 нафар варзишгар, аъзоёни дастаи мунтахаби Ҷумҳурии Тоҷикистон оид ба намудҳои мухталифи варзиш дар 78 чемпионатҳои ҷаҳон, Осиё ва мусобиқаҳои байналмилалӣ ширкат варзида, сазовори 461 медал, аз ҷумла 100 тилло, 130 нуқра ва 231 биринҷӣ гардиданд.