Қотилон дастгир шуданд

 
Душанбе, 29.01.2014. (АМИТ «Ховар»,  Лутфия  Эшонқулова).- Кормандони  мақомоти  ҳифзи  ҳуқуқи  кишвар  сокинони   шаҳри  Истаравшан  Аҳроми  Бозор,  Аслон  Азимбоев  ва  Илҳом  Алиқуловро, ки  ба  қатли    ҷавондухтаре гумонбар  шудаанд,   дастгир  намуданд. 
 
Назар ба  хабари  намояндаи Вазорати  корҳои  дохилии  ҷумҳурӣ,  27  январ  кормандони  шӯъбаи  минтақавии   мубориза бо  ҷинояткории  муташаккилонаи   шаҳри  Истаравшан  дар  ҳудуди  деҳаи  Охтангии  ҷамоати  Шаҳристон  ҷасади  сокини  шаҳри  Истаравшан  Мақсуда Қузиеваи  22 —  соларо  пайдо  намуданд. Дар  ҷараёни  амалиёти  фаврӣ  шахсони  зикршуда дастгир  гардиданд. Маълум  шуд, ки ҷинояткор  Аҳроми  Бозор Мақсуда  Қузиеваро  бераҳмона  латукуб  карда дар  натиҷаи  ин ҷабрдида  дар  маҳалли  воқеа  ба  ҳалокат  расидааст. 
 
Аз  рӯи  ин  ҳодиса  парвандаи  ҷиноӣ  кушода,  тафтишот  идома  дорад. 
 
Мувофиқи  маълумоти  Вазорати  корҳои дохилии  ҶТ,  тайи  соли  2013 дар  ҷумҳурӣ 18  ҳазору 336  ҳодисаи  ҷинояткорӣ  ба  қайд  гирифта шуд, ки  назар ба  соли  2012  баробари  1743  ҷиноят   зиёд  аст.  Сатҳи   ошкор  намудани  ҷиноятҳо  87 фоизро  ташкил  дод. Аз  ҷумлаи  3 ҳазору  111 ҷинояти  вазнин,  12 ҷиноят  кушторро  ташкил  медиҳад.