Баррасии масоили марбут ба маорифи Тоҷикистону Қатар

Душанбе, 22 январ. (АМИТ «Ховар»,Фарзона Достонзода).-Вохӯрии вазири маориф ва илми Ҷумҳурии Тоҷикистон Нуриддин Саидов бо Сафири Фавқулода ва Мухтори Давлати Қатар дар Ҷумҳурии Тоҷикистон Алӣ ибни Муборак Саид ал-Муҳаннадӣ 21 январ дар Душанбе баргузор гардид.Аз Вазорати маориф ба АМИТ «Ховар» иттилоъ доданд , ки дар ҷараёни мулоқот ҷонибҳо масоили марбут дар соҳаи маориф ва дурнамои рушди тарафайнро баррасӣ намуданд.Зикр гардид ,ки Давлати Қатар дастовардҳои назаррасеро дар зинаи таҳсилоти олии касбӣ соҳиб гаштааст ва омодааст ҷавонони тоҷикро дар муассисаҳои бонуфузи худ ба таҳсил фаро гирад.Нуриддин Саидов дар мулоқот дар бораи низоми маорифи кишвар маълумот дода, аз имконоти тарафайн дар самти аз тариқи квота ба таҳсил фаро гирифтани донишҷӯёни ҳар ду кишвар, омӯзиши забони арабӣ дар муассисаҳои таълимӣ, табодули донишҷӯён, анҷоми таҳқиқоти муштарак дар самтҳои мухталифи илм, баргузории конфронсҳо ва дигар масоили марбут ба таълиму тарбия сухан гуфт.Дар назар аст, ки пас аз омӯзиши ҳаматарафаи масъалаи мазкур тафоҳумномаи ҳамкории тарафайн омода ва ба тасвиб расад.