Дастгир шудани ҷавонони ғоратгар

Душанбе, 9 январ. (АМИТ «Ховар», Фарзона Ашӯрмадова).- Ду ҷавони 22 ва 20-солаи ноҳияи Данғара компютерҳои мактабро дуздида, аз ҷойи ҳодиса ғайб задаанд.Тавре ки дар ин бора сомонаи Вазорати корҳои дохилии кишвар хабар медиҳад, кормандони шуъбаи Вазорати корҳои дохилии ноҳияи Данғара бо гумони даст доштан дар дуздӣ шаҳрвандон Комилҷон Қосимови 22- сола ва Наврӯз Ғаниеви 20- соларо дастгир карданд, ки онҳо моҳи декабри соли гузашта бо тариқи шикастани қулфи дар вориди мактаби таҳсилоти умумии №56-и ноҳияи Данғара шуда, аз он ҷо 2 адад протсессор ва 2 адад компютерро, ки арзишашон 4000 сомониро ташкил медиҳад, дуздида аз ҷойи ҳодиса ғайб задаанд. Далелҳои шайъӣ гирифта шудаанд.Гуфта мешавад, ки нисбат ба ҳодисаҳои мазкур парвандаи ҷиноӣ оғоз гардида, тафтиш идома дорад.