Хутбаи ягонаи ҷумъа дар Миср

Душанбе, 29.01.2014. (АМИТ «Ховар»).-  Расонаҳои ахбори оммаи Ҷумҳурии Мисри Араб ва дигар кишварҳои минтақа хабар медиҳанд, ки аз 31 январи соли 2014 дар тамоми масҷидҳои ҷомеъи ин давлат хутбаи ягона, яъне хутба дар як мавзӯи мушаххас ҷорӣ карда хоҳад шуд. Дар ин бора қарори Вазорати авқофи Миср қабул гардидааст. Тибқи хабарҳои расида, ҳар моҳ мавзӯи хутба барои намозҳои ҷумъа аз ҷониби Раёсати дини Вазорат таҳия ва дар торномаи он нашр карда мешаванд, то имом-хатибони масоҷид аз рӯи он дар рӯзи ҷумъа баромад кунанд. Масалан, мавзӯъҳои хутбаи моҳи феврал “Нақши ҷавонон дар ҷомеа”, “Умедворӣ ва меҳнат” ва “Ҳифзи муҳити зист ва нақши он дар рушд” муқаррар гардидааст.Ҳамчунин хутбаҳо ва мавъизаҳо аз ин баъд зери назорати доимии Вазорати авқоф гирифта шуда, нисбати ҳар гуна кӯшишҳои истифодаи минбари масоҷид ба манфиатҳои ҳизбию тоифавӣ ва мазҳабӣ қотеона чора андешида хоҳад шуд.Дар Миср 85 ҳазор масҷиди ҷомеъ ва 35 ҳазор масҷиди панҷвақта (аз-Зовия) амал мекунад. Имом-хатиб то ин дам дар хондани хутба озод буда, дар ҳар мавзӯи интихоб кардааш озодона ба маҳзи иродаи худ метавонист ваъз бигӯяд. Вазорати авқоф танҳо дар баъзе муносибатҳо ба онҳо оид ба муҳимтарин масъалаҳои доғи рӯзи байналмилалӣ ва ҳаёти ҷомеа дастурамал содир мекард, то дар хутбаҳои худ роҷеъ ба он сухан гӯянд.Чанде қабл Вазири авқоф д-р Муҳаммад Мухтор Ҷумъа бо назардошти вазъи мураккаби кишвар ва таҳдиду хатарҳои фитнаангезӣ эълон кард, ки тамоми масоҷид таҳти тасарруфи Вазорати авқоф гузошта хоҳанд шуд. Аз ин баъд дар Миср ба масҷидҳое, ки ба ин ё он тоифа тааллуқ доштанд, хотима дода мешавад.То ҳол дар Миср ба ғайр аз масоҷиди расмии тобеъ ба Вазорати авқоф ҳамчунин масоҷиди дигар ба Ҷамоати Ихвонулмуслимин ва ҷараёнҳои мухталифи салафӣ тааллуқ доштанд ва сиёсату манфиатҳои он гурӯҳҳоро ба намозгузорон тарғиб мекарданд.Чи тавре эълон шуд, хутбаи ягонаи ҷумъаи оянда “Ғамхорӣ ва кӯмак ба ниёзмандону фақирон” хоҳад буд.