Ифтитоҳи маркази нави таълимии гумрукчиён

Душанбе, 22 январ. (АМИТ “Ховар”, Фарзона Ашӯрмадова).- «Таъмини назорати воридот ва бехатарии марзҳо»- (EXBS) таҳти чунин ном Сафорати ИМА дар Душанбе, маркази таълимии дарсҳои амалиро ба Ҳукумати Ҷумҳурии Тоҷикистон ба ҳайси кӯмаки бебозгашт дастрас намуд.  Тавре, ки дар ин бора аз Сафорати ИМА дар Тоҷикистон хабар доданд, маркази мазкур ҳамчун ҷузъи аслии Донишкадаи такмили ихтисоси кормандони Хадамоти гумрук, дар такмили омӯзиши касбии ҳайати гумрук бо шаклу усулҳои пешгирӣ ва зуд ошкор намудани силоҳи қатли ом (СҚО) ва васоити марбут ба он, инчунин силоҳи маъмулӣ кӯмаки назаррас мерасонад. Ба иттилои манбаъ, дар маросими ифтитоҳи расмӣ дар маркази мазкур, воқеъ дар дидбонгоҳи «Айнӣ» — и шаҳри Душанбе сафири ИМА дар Тоҷикистон Сюзан Эллиотт иштирок доштааст.Гуфта мешавад, ки Сафорати ИМА ба Ҳукумати Тоҷикистон ба ҳайси кӯмаки бебозгашт маркази таълимӣ бо арзиши умумии зиёда аз ду миллион доллари амрикоӣ дастрас намуд, ки он иқтидори Тоҷикистонро дар таъмини амнияти марзҳои он беҳтар хоҳад кард.