Кумаки «Равшандилон» ба хонандагон

Хоруғ, 10 декабр. (АМИТ «Ховар», Файз Мирасан).-Бо мақсади муътадил пушти сар кардани фасли зимистон ташкилоти ҷамъиятии «Равшандилон» ва мақомоти маҳаллии ноҳияи Рӯшон барои мактаби таҳсилоти миёнаи умумии рақами нуҳуми ноҳия ба маблағи 13 ҳазор доллар кӯмаки молӣ расонд. Сарвари ин мактаб Ҳалима Бердибекова гуфт, ки дар таъмири ҷории мактаб ҳудуди 10 ҳазор доллар аз сӯи ҷамъияти «Равшандилон» ва 3 ҳазор доллари дигар аз тарафи мақомоти маҳаллии ноҳия кӯмак шудааст. Ба гуфтаи ин манбаъ бо ин миқдор маблағ маҷлисгоҳи мактаб пурра таъмир гардида, ҳамчунин ҳамаи тирезаҳои синфхонаҳо аз нав васл шуданд. Мактаби таҳсилоти миёнаи умумии ноҳияи Рӯшон дар соли 1936-и асри гузашта сохта шуда, ба таъмиру навсозӣ ниёз дошт. Танҳо баъди ин дастгирӣ ва кумаки мақомоти маҳаллии ноҳия ва саҳми ҷамъияти мазкур шароити таълиму тарбия барои хонандагону омӯзгорон то андозае беҳтар шуд. Ба гуфтаи сарвари мактаб тирезаҳои нав имконияти гарминигаҳдории бештар дошта, ҳамчунин ҳар гуна садоҳои берунаро намегузаронад. Бояд гуфт , ки дар мактаби мазкур 54 нафар омӯзгор ба таълиму тарбияи 617 нафар хонанда машғул мебошанд.