Меъёри бозтамвил ба андозаи 0,7 банди фоизӣ паст шуд

Душанбе, 14 январ. (АМИТ «Ховар»).- Бо Қарори навбатии Раёсати Бонки миллии Тоҷикистон аз 10 январи соли 2014 меъёри бозтамвил ба андозаи 0,7 банди фоизӣ паст ва дар сатҳи 4,8 фоизи солона муқаррар гардид.  Тавре ки хадамоти матбуоти Бонки миллӣ хабар медиҳад, ин дафъа низ тағйироти навбатӣ бо назардошти кам гардидани фишорҳои таваррумӣ, таъсири омилҳои берунӣ ва бо мақсади таъмини самаранокии сиёсати пулию қарзӣ, нигоҳдории муътадилии ҳаҷми пул дар муомилот, мусоидат ба рушди воқеии иқтисодиёт ва бо ин роҳ паст кардани фоизи миёнаи қарзҳо дар низоми бонкӣ ворид шудааст. Мавриди ёдоварист, ки соли гузашта меъёри бозтамвили Бонки миллии Тоҷикистон ду маротиба — 8 июл ба андозаи 0,6 банди фоизӣ ва 7 октябр ба андозаи 0,6 банди фоизӣ паст карда шуда буд.