Моҳи январ футболбози беҳтарини Тоҷикистон номбар мешавад

Душанбе, 3 январ. (АМИТ «Ховар»).- 10 январ маросими ботантанаи мукофотонидани ғолибони мавсими футбол дар соли 2013 баргузор мегардад. Тавре ки аз Федератсияи футболи Тоҷикистон хабар доданд, дар ин маросим, ки дар он натиҷаи мавсими соли гузашта ҷамъбаст мегардад, дастаҳои ғолиби лигаҳои олӣ ва якум, мураббиҳо, доварон, собиқадорони футболи тоҷик, ҳамчунин меҳмонони сершумор иштирок менамоянд. Дар ҷараёни маросими ботантана ба ғолибону ҷоизони мусобиқоти лигаи олии Тоҷикистон дар соли 2013 — дастаҳои «Равшан», «Истиқлол» ва «Хайр» медалҳои тилло, нуқра ва биринҷӣ супурда мешаванд. Ғолибону ҷоизони лигаи якум – дастаҳои «Саройкамар» — и Панҷ, «Эсхата» — и Хуҷанд ва «Далерон» — «Уротеппа» — и Истаравшан» медалу мукофот мегиранд. Ғайр аз ин дар маросими мукофотонӣ ҷоизони бахшҳои «Дарвозабони беҳтарин», «Муҳофизи беҳтарин», «Ниммуҳофизи беҳтарин», «Ҳамлагари беҳтарин», «Нишонгири беҳтарин», «Мураббии беҳтарин», «Довари беҳтарин», «Бозингари беҳтарини хориҷӣ», «Футболбози беҳтарини дар мусобиқоти кишварҳои дигар иштирокдоштаи тоҷик», «Бозингари беҳтарини футболи занона», «Бозингари беҳтари футзал», «Бозингари беҳтарини ҷавон», «Мураббии беҳтарини дастаи кӯдакон» ва «Футболбози беҳтарини Тоҷикистон» номбар мешаванд. Қобили зикр аст, ки солҳои гуногун шаш нафар футболбозони ҷумҳурӣ соҳиби мукофоти «Бозингари беҳтарини соли Тоҷикистон» гардида буданд. Инҳо Хуршед Маҳмудов, Нӯъмон Ҳакимов, Аслиддин Ҳабибуллоев, Анвар Норқулов, Юсуф Рабиев ва Дилшод Восиев мебошанд.